ငါ့စိတ်က …
တစ်စုံတစ်ခုကို အမြဲတမ်းလိုအပ်နေတယ်
ငွေရောင်နာရီ၊ သူမရဲ့အလျှော့ပေးဆက်ဆံမှု
အလုပ်မလုပ်ပဲ ထမင်းစားနိုင်ခွင့်အပြင်
အိန်ဂျလီနာဂျိုလီနဲ့ ရင်းနှီးခွင့်ပါ လိုချင်ရဲ့
ဆုတောင်းတိုင်းပါ ပြည့်မယ်ဆိုရင်
ဖောက်သမျှကံစမ်းမဲတွေအတွက် ကံထူးသူ
အမေရိကန်ဗီဇာ၊ အမ်းမရိတ်မှာ ဘောလုံးပွဲကြည့်ခွင့်
ကမ်းခြေတစ်ခုမှာ ဘီယာထိုင်စုပ်ရင်း
လှိုင်းမူးနေတဲ့ ရော့(ခ်)သီချင်းတွေကိုမြည်းမှာပေါ့
အဟား …
ဆန္ဒတွေအတွက် ငါ ပေါ့ပါးသွက်လက်နေလိုက်တာ
ဆန္ဒတွေအတွက် ငါ လက်ရဲဇက်ရဲနိုင်နေလိုက်တာ
မျက်စိရှေ့က ပန်းခင်းကိုလည်း
နှုတ်ပစ်ဖို့ဝန်မလေးခဲ့ဘူး
မျက်နှာသစ်ပြီးစ နေရောင်ခြည်ကိုလည်း
အဆိပ်ခပ်ဖို့ ၀န်မလေးခဲ့ဘူး
ဖြစ်ချင်တော့ …
အဲဒီကောင်ကပဲ
အိုဇုန်းလွှာပေါက်ပြဲမှုကို
ကမ္ဘာကြီးပူနွေးလာမှုကို
လမ်းမီးတိုင်အောက်က ညဥ့်သမတွေရဲ့ ၀မ်းစာကို
မုန်တိုင်းရဲ့ ရွေ့လျားရာလမ်းကြောင်းကို
သူမကိုယ်ဝန်ဆောင်နိုင် မဆောင်နိုင်ကို
ဒီရေတောပြန်လည်စိုက်ပျိူးရေးကို
အကာအကွယ်မဲ့ လိင်ဆက်ဆံမှုကို
စီးပွားပျက်ကပ်နဲ့ အိုဘားမားရဲ့ ပေါ်လစီကို
သောက်ရေအိုးအဖုံးကို မရင်း
ရေအခပ်မှာ
စိုးရိမ်စိတ် ၀င်ခဲ့မိသေးတယ်
ဟုတ်ပါတယ် …
အဲဒီကောင်က
ဘာသာတရားမကိုင်းရှိုင်းပေမယ့် …
သီလမမြဲပေမယ့် …
သူ့အဇ္ဈတ္တကိုတော့ ပီပီသသ
သီချင်းလုပ်ဆိုတတ်ပါတယ်
အခုလည်းကြည့်လေ
သူက
လမ်းဘေးမှာ
သစ်ပင်တွေစိုက်လို့
ကွက်လပ်တွေကို တတ်နိုင်သလောက်ဖြည့်ရင်း
ကမ္ဘာကြီးရဲ့ အစိမ်းရောင်ဝတ်ရုံကို
သဘာဝတေးတစ်ပုဒ်နဲ့
ဖာထေးဖို့ကြိုးစားနေရဲ့
ဒီတစ်ခါလည်း
ဆန္ဒတွေအတွက်
ငါ …
ဟုတ်တိပတ်တိနိုင်နေလိုက်တာ …။ ။
0 comments:
Post a Comment